2013 Khuado
Dear Innkuanpih teng
Pasian' hehpihna tawh adam kim ding in hong lamen kawm in kong ho pih hi.
2013 Khuado tawh kisai Khuaso hong pai zo lo ta ding in hong khak khia ing.
Liimmuangte(Biedenkopf) leh Siampite(Dalpi) aw hehpihna tawh na Fotos (Maan)te uh pawlkhat hong khahkhia thei dingin hong lamen ung.
Zomi Innkuan Germany e.V Khuado pawi leh Kumcin Khawmpi
Zomi Innkuan Germany e.V Khuadofest und Jahresmigliedversammlung
Ani : 05.10.2013
Amun : Schäfflestrasse 19, 60386 Frankfurt am Main, Germany
Pasian hehpihna leh mimal kim ciat hanciamna tawh Germany a om Zomi a hi thei teng in 2013 Khuado pawi pen 05-10-2013 ni in Frankfurt ah nuam tak in zang thei ih hih manin hong pai mimal kim tungah a hizong in vai tuamtuam hang aa hong ki hel zolo te tungah ahizong in ZIG makaite tang in lungdamna kong pulak masa hi.
Khuado hun pen hun 3 in ki khen hi.
Hih Khuado pawi hun sungah mipite mahmah kilawp, ki maitai thei mahmah hi. Bang hang hiam cih leh Khuado pen kum 1 a khat vei bek a hih ban ah tu kum pen ZIG a ki phuat zawh Kum 10 cinna zong a hih man hi.
Khuado bawl cih ciang ankuang a ki um khawm hi aa, tua ding a huhna hong piate a hi Nu Dim te Innkuan( Hamburg), Liimmuang te Innkuan( Biedenkopf), David Sawm( Frankfurt)te tungah nakpi tak in lungdamna ih ko hi.
Neek le dawn nasep khempeuh hong sepsak a hi Sangoi bawl( Pa Bosco Thang, U Singpi), An huan, meh huan ( Nusan, Nu Lian)te tungah zong lungdamna kong pulak uh hi. Tu kum aa an pen liam diak hi.Sangoi ,Meh, Zasanmeh ,Satui , Vaimimciim, te pen lim lua ki sa in, lawmte a ding bel thei lo, kei bang lim sa lua ka hih ciangaa ka tutna pan ding khia vat zo lo liang.
Hun kipatna ding in Pa Paul Thang in hunapna hong nei hi.
Hun masa pen Zin muakna, Khuado tangthu genna, ZIG kum 10 lungdam kohna,Naupangte zola sakna, kumkhatsung ZIG nasepnate pulakna, Sumzat sumzeeknate pukakna cih bang in kizang hi.
Pawllu tang a hi Pa Bosco Thang in khuadopawi hong pai mimal tungah zin muakna leh Kawlgam pan hong tung thak a hi Pa Dalpi(hamburg) zi leh ta Nu …..leh Tg Nang Sian Siam(Siampi) mithak ki lak na hong nei hi.
Tuazawh ciang Tg Khuppi in Khuadopawi thu hong gen aa, zaknop kisa leh hoih ki sa mahmah hi.
Pa Paul Thang in ZIG Kum 10 cinna lungdam koh thugenna hong nei aa, tua sungah ZIG hong pian khiatna, ZIG min tawh Khuadopawi bawlna, kimuh khopna cihte leh ZIG e.V ih ngahna (kumpiten hong ciapteh sakna) cihte ki cing tak in Maan(photo) tawh hong gen thei hi.
Ih nau neute zong Zola leh lakam hong siam thei mah mah uh aa, lakam leh a khiatna hong gen lai tak bang zaknop kisa leh siam thei uh a hih man un Nutepate bang a kam uh kaa liang hi.
Pawl thuvanpi a hi Suanno in zong kumkhat sung sepna te hong pulak in ih nasepna te thupi mahmah hi.
Pawl Sumkem a hi Nikolas Mang in zong kum 1 sung sumzeekna hng gen hi.
Hun masa zawh lungdam kohna Pa Samuel Mung in hong nei hi
Hun nihna pen hong tung ding kum 2014-2016 ah ZIG Makai hong sem dingte teelna leh anneekna in kizang hi. Tua-ah Pa Kap Thang leh Pa Thang Suan Mung(Hamburg) hong makaih hi.
Pawl Lutangpi ding leh ahuh ding
Pawl Thuvanpi ding leh ahuh ding
Pawl Sumkeem ding leh ahuh ding
Pawl Information(Thu kizakna)Makai ding hih munte kitelna ki nei aa,
2014-2016 ZIG hong makai ding in hih a nuai a teng mipi in hong tel khia hi.
Pawl lutang ding in (Vorsitzender) Pa Nikolas Bill
Pawl lutang hih ding in ()Pa Peter Sian Khan Thang
Pawl thusa ding in Tg Khai Suan Khup
Pawl thusahuh ding in Tg Luan Mun Thang
Pawl sumkem ding in Nu Lian
Pawl sumkemhuh ding in Nusan
Pawl thukizakna Information ding in Pa Samuel Mung
hih teng mipi in hong tel khia uh hi. Makai thakte a ding Pawl lutang a hi Pa Boso Thang in thu ngetna apna hong neih sak hi.
Hun thumna pen gualnopna in ki zang hi. Zongeina late sa ziahziah in lam vui kawm in nuam ki sa thei mahmah hi. Zongeina late bek zong hi lo in tulai khangthaklate zong tawh kigualnuam mah mah hi. Gualnuam lai pipi mah in hunte hong cing to a hihmanin khawlkhawmnuam lai taleng kikhen hong kul ta aa nunglam mitnei bang keek tek in ut lai pipi in inn lam kizuan ciat hi.
Topa Pasian in a kua ma peuh thupha hong pia ta hen.
lungdam kohna
Khai Suan Khup (Khuppi)
ZIG Group mail pan a ki la hi